لاہور۔31اگست (اے پی پی) ڈی جی پی ݙی ایم اے عرفان علی کاٹھیا آکھیے جو پنجاب اچ ایں ویلھے تاریخ دا ساریں توں وݙا چھل دا ریلہ لنگھدا پئے، ہݨ تئیں چھل توں متاثرہ لوکاں دی تعداد 2 ملین توں ودھ ڳئی اے، آوݨ آلے چووی گھنٹے اچ ملتان کوں چھل دا خطرہ تھی سڳدے۔ انہاں اے ڳالھ پریس کانفرنس کریندیں آکھی۔ ڈی جی پی ݙی ایم اے آکھیا جو پنجاب اچ ایں ویلھے تاریخ دا ساریں توں وݙا چھل دا ریلہ لنگھدا پئے اتے ایں طرح صوبہ ہک تاریخی چھل دی دی زد اچ اے، اڳلے چووی گھنٹے اچ ملتان کوں خطرہ تھی سڳدے جݙاں جو دریائے ستلج دا پاݨی چار ضلعیں توں لنگھسی۔ انہاں آکھیا جو ایں ویلھے قصور توں ݙو لکھ سٹھ ہزار دا ریلہ لنگھدا پئے، ہیڈ سلیمانکی تے ہک لکھ 75 ہزار کیوسک دا ریلہ اوکاڑہ پاکپتن توں لنگھسی۔ ایویں ہیڈ اسلام تے ہک لکھ پینتری ہزار دا ریلہ لنگھسی جݙاں جو دریائے راوی اچ بلوکی تے ایں ویلھے پاݨی دا وہݨ ودھدا پئے ۔ انہاں آکھیا جو خانیوال دیاں وستیاں آوݨ آلے چووی گھنٹے اچ متاثر تھیسن، ݙو ستمبر کوں راوی دا پاݨی چناب نال مِلسی جیں نال کبیر والا اتے خانیوال دیاں وستیاں متاثر تھیسن، ضلعی انتظامیہ ہر طرح نال الرٹ اے۔ انہاں آکھیا جو تریموں ہیڈ تے پاݨی دا وہݨ اٹھاراں گھنٹے لیٹ تھئے، کَل ݙوپہر کوں ست لکھ کیوسک دا ریلہ ہیڈ تریموں توں لنگھسی، ہیڈ محمد والا تے اَٹھ لکھ کیوسک دا ریلہ متوقع اے اتے شیر شاہ برج توں وی ریلہ لنگھسی۔ انہاں آکھیا جو وزیراعلیٰ دی ہدایت موجب سارے ادارے متحرک ہن اتے لوکاں دیاں جاناں اتے مال کوں ریسکیو کرݨ اچ مصروف ہن۔
