اسلام آباد۔23مئی (اے پی پی):وزیرخارجہ بلاول بھٹو زرداری عالمی اقتصادی فورم دے ترائے ݙینھ وار سالانہ اجلاس اچ شرکت کیتے سویٹزرلینڈ دے شہر ڈیووس روانہ تھی ڳئن ۔دفتر خارجہ دے ترجمان دی طرفوں جاری بیان موجب وزیرخارجہ کوں اجلاس اچ شرکت دی دعوت عالمی اقتصادی فورم دے صدر ݙتی اے ۔ وزیر مملکت خارجہ حنا ربانی کھر وی وزیر خارجہ بلاول بھٹو زرداری دے رلے ہن۔ وزیر خارجہ بلاول بھٹو زرداری 23 توں 26 مئی تئیں ڈیووس اچ فورم دے سالانہ اجلاس اچ شرکت کریسن ۔ وزیر خارجہ اتے وزیر مملکت ݙوہیں عصری عالمی اتے علاقائی مسئلیں تے عالمی اقتصادی فورم دی تقریبات اچ شرکت کریسن ۔ وزیر خارجہ ابھردی ہوئی جغرافیائی سیاسی پیشرفت دے معاشی اتے سماجی اثرات دے نال کورونا وبا، خوراک اتے توانائی دے تحفظ اتے موسمیاتی تبدیلی توں پیدا تھیوݨ آلے چیلنجاں بارے پاکستان دا نقطہ نظر پیش کریسن ۔ بلاول بھٹو زرداری سالانہ اجلاس اچ شریک اپݨے ہم منصباں نال وی ملاقات اتے میڈیا نال ڳالھ کریسن ۔ ورلڈ اکنامک فورم ہر سال سیاسی اتے کاروباری رہنماواں دے نال نال بین الاقوامی تنظیماں دے نمائندیں، سول سوسائٹی اتے دنیا توں نینگراں دے نمائندگی کوں کٹھا کریندے تاں جو معاشی، سماجی اتے ماحولیاتی چیلنجاں تے قابو پاوݨ کیتے رستے دی نشاندہی کیتی ونڄ سڳے ۔
