اسلام آباد – 05 – آڪٽوبر (اي پي پي) نگران وزيراعظم انوارالحق ڪاڪڙ نيشنل ايمرجنسي آپريشن سينٽر (اين اي او سي) قائم ڪرڻ کي ساراهيندي چيو آهي ته ان سان نه رڳو مستقبل ۾ قدرتي آفتن کي منهن ڏيڻ جي لاءِ ٺوس ڪوششن پر قدرتي آفتن جي خطرن ۽ نقصانن کي گهٽ ڪرڻ ۾ مدد ملندي، موسمياتي تبديلي هڪ حقيقي چئلينج آهي، جيستائين اسان ان کي منهن ڏيڻ جي لاءِ اهڙا ٺوس قدم نه کڻنداسين ان سان اسان جي ايندڙ نسل پريشان رهندي، دنيا کي اڳتي وڌڻ ۽ پاڪستان جهڙن اسرندڙ ملڪن کي موسمياتي تبديلي جي منفي اثرن کي منهن ڏيڻ جي لاءِ مدد ڪرڻ جي ضرورت آهي. وزيراعظم آفيس جي ميڊيا ونگ پاران جاري بيان موجب نگران وزيراعظم انوارالحق ڪاڪڙ اين ڊي ايم اي هيڊڪوارٽرز ۾ نئين قائم ڪيل جديد ترين ”نيشنل ايمرجنسي آپريشن سينٽر“ (اين اي او سي) جو افتتاح ڪيو. ان موقعي تي نگران وزيراعظم اين اي او سي قائم ڪرڻ کي ساراهيندي چيو ته ان سان نه رڳو مستقبل ۾ قدرتي آفتن کي منهن ڏيڻ جي لاءِ ٺوس ڪوششن پر قدرتي آفتن جي خطري ۽ نقصانن کي گهٽ ڪرڻ ۾ مدد ملندي. قدرتي آفتن کان محفوظ رهندڙ بنيادي ڍانچي ۽ پاليسي فريم ورڪ جي اهميت تي زور ڏيندي نگران وزيراعظم چيو ته عالمي سطح تي ڪاربن خارج ٿيڻ ۾ سڀ کان گهٽ حصيدار هجڻ جي باوجود پاڪستان موسمياتي تبديلين کان متاثر ٿيندڙ سرفهرست ملڪن مان هڪ آهي، موسمياتي تبديلي هڪ حقيقي چئلينج آهي، جيستائين اسان ان کي منهن ڏيڻ جي لاءِ اهڙا ٺوس قدم نه کڻنداسين ان اسان اسان جي ايندڙ نسل پريشان ٿيندي. نگران وزيراعظم 2022ع جي تباهي آڻيندڙ ٻوڏ دوران سمورن رياستي ادارن خاص طور تي اين ڊي ايم اي جي ٺوس ڪوششن کي پڻ ساراهيو. ملڪ جي اٽڪل ٽيون حصو آبادي 2022ع ۾ ٻوڏ کان متاثر ٿي هئي ۽ 30 ارب ڊالر جي معاشي نقصان جو ڪاٿو لڳايو ويو هو. دنيا کي اڳتي وڌڻ جي ضرورت آهي ۽ پاڪستان جهڙن اسرندڙ ملڪن کي موسمياتي تبديلي جي منفي اثرن کي منهن ڏيڻ جي لاءِ مدد ڪرڻ جي ضرورت آهي. نگران وزيراعظم ڪوويڊ 19 ۽ 2022ع جي ٻوڏ جي دوران اين سي او سي جي ڪردار کي پڻ ساراهيو. بريفنگ ۾ نگران وزيراعظم کي ٻڌايو ويو ته اين اي او سي موسمياتي تبديلي، قدرتي آفتن کي منهن ڏيڻ ۽ قومي هنگامي صورتحال جي لاءِ اڳڪٿي ڪندڙ ماڊلنگ بابت سموري فني معلومات جي مرڪز طور ڪم ڪندو، پاڪستان ۽ خطي ۾ اهو پنهنجي نوعيت جو پهريون مرڪز آهي جيڪو پاڪستان جي مقامي طور تي جوڙيل صلاحيت آهي جيڪو ممڪن جاين، اثرن جي وقتن ۽ نقصان جي شدت بابت يقين ۽ درستگي سان مستقبل جي آفتن جي اڳڪٿي ڪرڻ جي صلاحيت رکي ٿو، اهو ٺوس ردعمل جي ڪوششن کي سگهه ڏيندو، صوبائي ۽ ضلعي سطح جي ڊيزاسٽر مئنيجمينٽ اٿارٽيز جي سطح تي رهنمائي فراهم ڪندو. بريفنگ دوران ٻڌايو ويو ته هڪ اهڙي پليٽ فارم جي ضرورت محسوس ڪئي وئي هئي جيڪو قدرتي آفتن جي نگراني، اعليٰ ٽيڪنالاجي سان هلندڙ صلاحيت جي قومي اهليت جي تياري جي لاءِ ڪم ڪري، اهو ڪمزور علائقن جي ضرورتن جو اندازو لڳائي سگهي ٿو ۽ حقيقي قومي گڏيل فعاليت جي صورتحال جي ڏس ۾ هر وقت تيار مجموعي قومي منظرنامي جي ذريعي عالمي حصيدارن پاران اڳ کان ٺوس تعاون جي خال جو تعين ڪري سگهي ٿو. اين ڊي ايم اي چيئرمين ليفٽيننٽ جنرل انعام حيدر ملڪ نگران وزيراعظم جي لاءِ بريفنگ سيشن منعقد ڪيو جنهن ۾ خاص مهمان سان گڏوگڏ سفيرن، گڏيل قومن جي تنظيمن جي ڪنٽري هيڊز، عالمي اين جي اوز، پاڪستان جي ناليوارن تعليمي ادارن جي دانشورن ۽ ماهرن شرڪت ڪئي. هن ماضي ۾ قدرتي آڦتن ۽ قومي هنگامي صورتحال ۾ پاڪستان جي وسيع پس منظر مان اهم جز پيش ڪيا ۽ اين اي او سي جي ذريعي قدرتي آفتن جي فعال انتظام جي لاءِ اين ڊي ايم اي جي نئين ويزن تي پنهنجي راءِ جو اظهار ڪيو. ان ويزن جي بنيادي طور تي وزيراعظم آفيس ۽ قدرت آفتن کي منهن ڏيڻ جي سمورين لاڳاپيل قومي ڌرين منظوري ڏني هئي. تقريب ۾ قومي ۽ عالمي معززين شرڪت ڪئي جن اعليٰ نتيجن تي ٻڌل گهڻ رخي افاديت جي اين اي او سي جي گهٽ وقت ۾ قيام ۽ تيزي سان ترقي تي پاڪستان حڪومت کي ساراهيو جنهن ۾ اسٽريٽجڪ سيڙپڪاري جي تحفظ ۽ گڏيل ترقي جو واعدو ڪيو ويو آهي.
