کراچی۔12ستمبر (اے پی پی):پاک فضائیہ خیبرپختونخوا، بلوچستان، سندھ اتے جنوبی پنجاب دے سیلاب توں متاثرہ علاقیں اچ ریسکیو تے بحالی دے عمل کیتے ہر ممکن تعاون کریندی پئی اے ،پاک فضائیہ دی طرفوں جاری اعلامیہ موجب پاک فضائیہ دا ہوائی بیڑہ تے ہیلی کاپٹرز سیلاب متاثرین دے محفوظ انخلاء سودھے کھاوݨ پیوݨ دیاں چیااں تے طبی سامان دی بذریعہ ائیر ڈراپ ترسیل اچ وی اہم کردار اداکریندے پئن ۔ پاک فضائیہ دی میڈیکل ٹیماں سیلاب متاثرین دی اوکھ کوں گھٹ کرݨ کیتے فلڈ ریلیف کیمپاں اچ مسلسل طبی امداد ݙیوݨ کیتے ݙینھ رات مصروف عمل ہن۔گزریل 24 گھنٹے اچ پاک فضائیہ دی ایمرجنسی ریسپانس ٹیماں ضرورت مند خانداناں اچ 22 ہزار 785 تیارکھاݨے دے پیکٹ، 250 پاݨی دیاں بوتلاں1380 بنیادی غذائی اجناس تے مشتمل خشک راشن دے پیکٹ ونڈیے ۔ ایں توں انڄ مفت خوراک تے رہائش دی فراہمی دے علاوہ پاک فضائیہ دے فیلڈ میڈیکل کیمپاں اچ میڈیکل ٹیماں 1389 مریضاں دا طبی معائنہ وی کیتے۔
